Skol pa Desaroyo Integral Tirzo Martha 

Bon biní na nos wèpsait! 

Bo a yega na e lugá korekto pa haña tur informashon tokante di nos skol. 

E skol ku tin komo lema: Ekselensia pa krea herensia i Nos ta brasa ekselensia. E skol ku ta krea un ambiente sigur, amigabel i yen di reto, pa tur mucha por desaroyá nan abilidatnan i siñansa na un manera optimal. 

Nos ta kere den e poder di traha huntu, deskubrí i krese na konosementu i na desaroyo personal. Nos skol ta kere den arte i e desaroyo kreativo di kada mucha manera e vishon di Señor Tirzo Martha.

Skol pa Desaroyo Integral Tirzo Martha ta situá den e dushi bario di Buena Vista i ta forma parti di Direktiva di Skolnan Públiko (DOS). Nos skol ta karga e nòmber di señor Tirzo Martha (Willemstad,16 di yüni 1965) ku hopi honor i orguyo. Un eskultor/artista yu di Kòrsou, konosí pa su bunita arte i ku a biba den e bario di Buena Vista.

Nos wèpsait ta kontené diferente informashon importante tokante nos enseñansa, nos meta, vishon i mishon, aktividatnan i asuntunan práktiko relashoná ku skol Tirzo Martha. Pa medio di e wèpsait aki bo ta haña un bista ken nos ta i kiko nos ta para p’é. 

Nos ta deseá bo hopi plaser pa tur loke bo ta lesa i mira riba nos wèpsait. Si ainda bo tin kualke pregunta òf bo ke bin konosé nos skol, no duda pa tuma kontakto ku nos. Bo ta mas ku bon biní pa eksperensiá kon dushi skol Tirzo Martha ta!