Bonbiní na VSO-ZMLK Marieta Alberto
Bonbiní riba nos página. Nos ta un skol spesial avansá ku ta resortá bou di direktiva di Servisio di Skolnan Públiko.
Nos portanan di skol a habri na ougùstùs 1999 i ya pa 26 aña nos ta brinda
enseñansa práktiko na hóbennan for di 16 te ku 23 aña, ku tin un nivel intelektual abou i difikultat severo pa siña, ku ta bini di un skol di fundeshi spesial ZMLK.
Nos enfoke ta pa engrandesé, pa medio di enseñansa práktiko e abilidatnan sosial emoshonal, kreativo i kognitivo di e hóben i pa fortalesé su talento i abilidatnan pa e por yega na su independensia, un outo-estima haltu i sobrebibensia den komunidat, denter di su posibilidatnan.
Vishon
Pa medio di struktura i uniformidat dentro di enseñansa práktiko, nos meta ta pa logra sobrebibensia, outo-estima i resiliensia serka e hóben ku un desabilidat intelektual, di edat entre 16 pa 23 aña, pa asina e por gosa di un bida di kalidat.
Mishon
Nos ta tuma un aserkamentu pragmátiko ku e hóben, pa e por ehersé su tareanan mas independientemente posibel i deskubrí i desaroyá su talento- i abilidatnan. Nos ta hasi esfuerso pa e hóben sinti su mes protegá, aseptá, felis i motivá pa esaki enkurashá un aktitut personal-sosial positivo. Nos ta traha na aseptashon di i rèspèt pa e hóben i pa logra inklushon di e hóben den komunidat i merkado laboral.
